विद्यार्थ्यांनो, व्यसनांपासून दूर राहून व्यसनमुक्त जीवनाचा संकल्प करा : पोलीस निरीक्षक सार्थक नेहेते

देवळा : महाराष्ट्र शासनाच्या ‘नशामुक्ती अभियान’ अंतर्गत देवळा येथील कर्मवीर रामरावजी आहेर महाविद्यालयात विद्यार्थ्यांसाठी जनजागृती कार्यक्रम घेण्यात आला. देवळा पोलीस ठाण्याचे वरिष्ठ पोलीस निरीक्षक सार्थक नेहेते यांनी विद्यार्थ्यांना अमली पदार्थांचे दुष्परिणाम, सायबर गुन्ह्यांपासून बचाव आणि ‘डायल ११२’ आपत्कालीन सेवेबाबत यावेळी मार्गदर्शन केले.

गांजा, एमडी (मेफेड्रोन), नशायुक्त गोळ्या व अन्य अमली पदार्थांमुळे होणारे शारीरिक, मानसिक, सामाजिक व आर्थिक नुकसान यावेळी स्पष्ट करण्यात आले. ‘क्षणिक आनंदासाठी सुरू झालेले व्यसन संपूर्ण आयुष्य उद्ध्वस्त करू शकते,’ असा संदेश देत विद्यार्थ्यांनी व्यसनमुक्त राहण्याचा संकल्प करावा, असे आवाहन नेहेते यांनी केले.

वाढत्या सायबर गुन्ह्यांच्या पार्श्वभूमीवर विविध ॲप्सचा वापर करताना घ्यावयाची खबरदारी, ऑनलाइन फसवणूक व सायबर धोक्यांपासून बचावाच्या उपाययोजनांची माहिती विद्यार्थ्यांना देण्यात आली. तसेच तातडीच्या प्रसंगी डायल ११२ वर संपर्क साधून त्वरित मदत मिळविता येते, याबाबतही पोलीस निरीक्षक नेहेते यांनी माहिती दिली.