वेगवान मराठी डिजीटल टीम
नाशिक, ता. 7 जानेवारी 2024 Diesel entered his mouth and he died… See exactly what happened. शेतात काम करताना आपण अनेकदा घाईघाईत ‘जुगाड’ करतो, मात्र हाच जुगाड कधी काळ बनून येईल याचा नेम नसतो. अशीच एक हृदयद्रावक घटना जळगाव जिल्ह्यातील जामनेर तालुक्यात घडली आहे. ट्रॅक्टरमध्ये नळीने डिझेल ओढत असताना ते पोटात गेल्याने एका ३४ वर्षीय तरुण चालकाचा मृत्यू झाला आहे. या घटनेमुळे संपूर्ण जिल्ह्यात खळबळ उडाली असून शेतकरी बांधवांमध्ये भीतीचे वातावरण आहे.
व्हिडीओ पहा वाचण्याचा कंटाळा येतो ना
नेमकी घटना काय? मिळालेल्या माहितीनुसार, पिंप्री फत्तेपूर येथील रहिवासी सलिम तडवी (वय ३४) हे गुरुवारी आपल्या शेतात ट्रॅक्टरने मशागतीचे काम करत होते. कामाच्या ओघात ट्रॅक्टरमधील डिझेल संपले. सलिम यांनी कॅनमधून डिझेल काढण्यासाठी नेहमीप्रमाणे प्लास्टिकची नळी तोंडाने ओढून डिझेल काढण्याचा प्रयत्न केला. मात्र, दाबाने आलेले डिझेल थेट त्यांच्या नाका-तोंडातून पोटात गेले.
४ दिवसांची मृत्यूशी झुंज अपयशी डिझेल पोटात गेल्याने सलिम यांना तातडीने अस्वस्थ वाटू लागले. त्यांच्या शरीरात विषबाधा (Diesel Poisoning) झाल्याचे लक्षात येताच कुटुंबीयांनी त्यांना जळगाव येथील शासकीय रुग्णालयात दाखल केले. डॉक्टरांनी सलिम यांचा जीव वाचवण्यासाठी शर्थीचे प्रयत्न केले, मात्र अंतर्गत अवयवांना गंभीर इजा झाल्याने रविवारी मध्यरात्री त्यांची प्राणज्योत मालवली.
कुटुंबाचा एकमेव आधार हरवला सलिम तडवी हे त्यांच्या कुटुंबातील एकमेव कमावते व्यक्ती होते. त्यांच्या अकाली निधनामुळे वृद्ध आई-वडील, पत्नी आणि दोन लहान मुलांच्या डोक्यावरचे छत्र हरवले आहे. एका साध्या चुकीमुळे हसते-खेळते कुटुंब उद्ध्वस्त झाल्याने परिसरात हळहळ व्यक्त केली जात आहे.
शेतकऱ्यांसाठी सावधानता: ही घटना सर्व वाहन चालक आणि शेतकऱ्यांसाठी एक मोठा धडा आहे. इंधन भरताना कधीही तोंडाचा वापर करून नळीने डिझेल किंवा पेट्रोल ओढू नका. यासाठी बाजारात मिळणाऱ्या स्वस्त ‘हँड पंप’चा वापर करावा, असे आवाहन प्रशासनाकडून करण्यात आले आहे.
