समाजहिताचा आदर्श निर्णय विवाहसोहळ्यातील खर्च व आहेर रुग्णवाहिकेसाठी; निघूट व बारे पाटील कुटुंबाचा कौतुकास्पद उपक्रम

वेगवान मराठी /एकनाथ भालेराव

येवला: दिनांक :7 डिसेंबर │ आजच्या काळात विवाहसोहळ्यांमध्ये होणारा अनावश्यक दिखावा, खर्च आणि स्पर्धा वाढत चालली असताना येवला तालुक्यातील सायगाव येथे समाजहिताचा एक उज्ज्वल आदर्श उभा राहत आहे. निघूट परिवार व बारे पाटील परिवार यांनी आपला मुलगा चि. शुभम आणि कन्या चि. सौ. का. अक्षय्या यांच्या विवाहसोहळ्याला दिखाव्याच्या चौकटीतून बाहेर काढत, थेट समाजसेवेची दिशा निवडली आहे. दोघांचा साखरपुडा आणि विवाह सोहळा रविवार, ७ डिसेंबर रोजी एकाच दिवशी, पारंपारिक आणि अतिशय साध्या पद्धतीने साजरा झाला आहे.

समाजसेवेला प्राधान्य — अनोखं पाऊल

या शुभप्रसंगी दोन्ही कुटुंबांनी विवाहातील रोख आहेर, वाचवलेला खर्च आणि कार्यक्रमातील इतर निधी गावासाठी रुग्णवाहिका (Ambulance) खरेदीसाठी देण्याचा ऐतिहासिक निर्णय घेतला आहे. सायगाव व परिसरातील नागरिकांना आपत्कालीन परिस्थितीत रुग्णवाहिका मिळण्यात नेहमीच अडचणी यायच्या. विशेषतः रात्रीच्या वेळेस किंवा तातडीच्या परिस्थितीत योग्य वाहन मिळेपर्यंत वेळ निघून जायची. या तातडीच्या गरजेला प्रतिसाद देत दोन्ही कुटुंबांनी समाजहिताची दिशा धरली.

“सोहळा महत्त्वाचा की समाज?” — कुटुंबीयांची भावनिक भूमिका

दोन्ही कुटुंबीयांनी सांगितले,
“सोहळे काही तासाचे असतात, पण समाजाला दिलेली मदत अनेक वर्षे जगते. आमच्या मुलांच्या नवीन जीवनाची सुरुवात समाजाशी जोडलेली राहावी, हे आमचे स्वप्न आहे.”

गावातील अनेकांनी या निर्णयाचे स्वागत करत, “इतरांनीही यापासून प्रेरणा घ्यावी. विवाह हा आनंदाचा प्रसंग आहे, परंतु समाजसेवा हा त्यापेक्षा मोठा आनंद आहे,” अशी प्रतिक्रिया दिली.

ग्रामस्थांचा उत्स्फूर्त प्रतिसाद

या उपक्रमाची बातमी समजताच सायगाव परिसरात आनंदाचे वातावरण पसरले. वैद्यकीय सुविधेची कमतरता जाणवणाऱ्या या भागात रुग्णवाहिका मिळणे हा नागरिकांसाठी मोठा दिलासा ठरणार आहे.
ग्रामस्थांनी या निर्णयाचे कौतुक करत, “हा फक्त विवाह नाही, तर सामाजिक कर्तव्याची सुरुवात आहे,” असे मत व्यक्त केले.

दिखावा नको, साथ हवी

कार्यक्रमाला उपस्थिती आणि शुभाशीर्वाद हीच खरी साथ असल्याचे दोन्ही कुटुंबांनी स्पष्ट केले आहे. “फुलांच्या सजावटीपेक्षा एखादा जीव वाचला तर त्यापेक्षा मोठं काही नाही,” असा भावनिक सूरही त्यांनी व्यक्त केला.

नवदाम्पत्याच्या नवजीवनाची सुरुवात समाजकार्यातून होत असल्याने सायगावात या विवाहसोहळ्याची चर्चा जोमात आहे. ग्रामीण भागात असा निर्णय दुर्मीळ असून, या उपक्रमामुळे ‘सोहळा सुंदर पण समाजसेवा श्रेष्ठ’ हा संदेश अधोरेखित झाला आहे.