एका तालुक्यात शंभर गावांमध्ये बैलपोळा उत्साहात साजरा
वेगवान मराठी : मारुती जगधने
नांदगाव –
[दि . 22 ऑगस्ट 2025 ] रोजी नांदगाव तालुक्यातील 88 ग्रामपंचायतीसह एकूण शंभर गावांमध्ये पारंपरिक बैलपोळा सण उत्साहात साजरा करण्यात आला.
या निमित्ताने शेतकऱ्यांनी आपल्या बैलांची पारंपरिक पद्धतीने सजावट करून, डोक्यावर रंगीबेरंगी झुल, कंठी, गळ्यात माळा व पायांमध्ये घुंगरं घालून शोभेच्या मिरवणुका काढल्या. बैलांची पूजा करून त्यांना गूळ-भाकर, हरभरा, भात व मिठाईचा नैवेद्य अर्पण करण्यात आला.
प्रत्येक गावात ढोल-ताशांचा गजर, लेझीम पथकांची कला, महिलांचा उत्स्फूर्त सहभाग आणि मुलांचा आनंद यामुळे सणाला उत्सवी रंग चढला. अनेक ठिकाणी शेतकऱ्यांनी एकत्र येऊन पारंपरिक खेळ व सांस्कृतिक कार्यक्रम आयोजित केले.
या वेळी ग्रामपंचायत सदस्य, सामाजिक संघटना तसेच युवक मंडळांनी देखील आयोजनात पुढाकार घेतला. “बैल हा शेतकऱ्याचा खरा सोबती आहे” या भावनेतून ग्रामस्थांनी परंपरेचे पालन करत बैलांचा सन्मान केला.
शंभर गावांमध्ये एकाच दिवशी झालेला हा सण तालुक्यातील ग्रामीण ऐक्य व शेतकऱ्यांच्या सांस्कृतिक परंपरेचे दर्शन घडवणारा ठरला.
