नांदगाव तालुका मुसळधार पावसाने जलमय?
वेगवान मराठी : मारुती जगधने
नांदगाव, दि. ८ जून २०२६ : नांदगाव तालुक्यात सोमवारी झालेल्या मुसळधार पावसाने संपूर्ण तालुका जलमय झाला. दुपारनंतर अचानक वातावरणात बदल होऊन काळे ढग दाटून आले आणि जोरदार पावसाला सुरुवात झाली. काही वेळातच पावसाचा जोर वाढल्याने रस्ते, शेतशिवार आणि सखल भागांमध्ये पाणी साचले.
तुफान वाऱ्यासह झालेल्या पावसामुळे काही ठिकाणी झाडे उन्मळून पडली, तर वीजपुरवठ्यावरही किरकोळ परिणाम झाल्याची माहिती मिळाली. अनेक गावांतील शेतांमध्ये मोठ्या प्रमाणात पाणी साचल्याने परिसरात सर्वत्र पाण्याचेच साम्राज्य दिसून येत होते. नाले आणि ओढ्यांना पाणी आल्याने नागरिकांनी सावधगिरी बाळगली.
या पावसामुळे उकाड्यापासून नागरिकांना दिलासा मिळाला असून वातावरणात गारवा निर्माण झाला आहे. तालुक्यातील जवळपास सर्वच भागांत पावसाने हजेरी लावल्याने शेतकरी वर्गात समाधानाचे वातावरण आहे. खरीप हंगामाच्या तयारीसाठी हा पाऊस लाभदायक ठरणार असल्याची अपेक्षा व्यक्त करण्यात येत आहे.
दरम्यान, पावसामुळे संपूर्ण परिसर हिरवागार आणि प्रसन्न दिसू लागला असून नांदगाव तालुक्यातील जनजीवन काही काळासाठी विस्कळीत झाले असले तरी पावसाच्या आगमनाने नागरिकांमध्ये आनंदाचे वातावरण निर्माण झाले आहे.
