कौटुंबिक वादातून देवळा तालुक्यात मेव्हण्याने केला सालीचा खून

शुक्रवारी सकाळी ज्ञानेश्वर जाधव, पत्नी छाया, सासू ताईबाई, साला सोनू कराटे व इतर नातेवाईक श्याम माळीची समजूत काढण्यासाठी भऊर फाटा येथे गेले होते. ते निखील आहेर यांच्या शेताच्या गेटजवळ थांबले असता, आरोपी श्याम त्याचा पुतण्या दादू माळी याच्यासोबत मोटारसायकलवरून तिथे आला. नातेवाईक त्याची समजूत काढत असतानाच आरोपीने अचानक चाकू काढून पत्नी मायावर वार करण्याचा प्रयत्न केला. मात्र, सोनू कराटे यांनी मायाला मागे ओढल्याने तिचा जीव वाचला. याचा राग येऊन आरोपीने “तू कायम आमच्या नवरा-बायकोमध्ये येते,” असे म्हणत छाया जाधव यांच्या छातीवर चाकूने जोरदार वार केला. यात गंभीर जखमी झालेल्या छाया यांना तातडीने कळवण ग्रामीण रुग्णालयात नेण्यात आले, परंतु डॉक्टरांनी त्यांना मृत घोषित केले. या भांडणात सोनू कराटे यांच्याही दोन्ही हातांना चाकू लागून दुखापत झाली आहे.

घटनेनंतर आरोपी श्याम माळी घटनास्थळावरून पसार झाला होता. तो पिळकोस-खामखेडा-सावकी परिसरात असल्याची माहिती देवळा पोलीस ठाण्याचे पोलीस निरीक्षक सार्थक नेहेते व पोलीस शिपाई संदीप चौधरी यांनी खामखेडा येथील लोकनियुक्त सरपंच अॅड. वैभव पवार यांना दिली.

माहिती मिळताच सरपंच वैभव पवार यांनी तातडीने खामखेडा चौफुली परिसरात शोध सुरू केला. पोलिसांच्या फोटोवरून संशयित आरोपी जात असल्याचे दिसताच, त्यांनी गावातील सोनू शेवाळे, माणिक शेवाळे, सचिन शेवाळे, रोशन शेवाळे, अमोल बिरारी, वकील शेवाळे व सौरभ शेवाळे यांना गोळा केले. सर्वांनी मिळून फिल्मी स्टाईलने पाठलाग करत आरोपी श्याम माळीला पकडून पोलिसांच्या स्वाधीन केले. ग्रामस्थांच्या या धाडसी कामगिरीचे परिसरात कौतुक होत आहे.

आरोपीविरुद्ध देवळा पोलीस ठाण्यात खुनाचा गुन्हा दाखल करण्याची प्रक्रिया सुरू असून, पोलीस निरीक्षक सार्थक नेहेते यांच्या मार्गदर्शनाखाली सहाय्यक पोलीस निरीक्षक नंदा पाटील, पोलीस उपनिरीक्षक हेमंत राऊत, विनय देवरे, पोलीस हवालदार नितीन बाराहाते, भास्कर सोनवणे, दिलीप सोनवणे, संदीप चौधरी, शरीफ शेख, राहुल शिरसाठ व संजय मोरे पुढील तपास करीत आहेत.