राष्ट्रवादी युवक काँग्रेसचे निवेदन; गिरीश महाजन यांच्यावर कारवाईची मागणी
वेगवान मराठी : मारूती जगधने
नांदगांव (जि. नाशिक) : नांदगाव येथील राष्ट्रवादी युवक काँग्रेसच्या वतीने तालुका पोलीस स्टेशन येथे एक अधिकृत निवेदन सादर करण्यात आले आहे. प्रजासत्ताक दिनानिमित्त झालेल्या एका भाषणावरून राज्याचे कुंभमेळा मंत्री गिरीश महाजन यांच्याविरोधात कायदेशीर कारवाई करण्याची मागणी या निवेदनाद्वारे करण्यात आली आहे.
हे निवेदन शहर अध्यक्ष गौतम विजय जगताप यांनी पोलीस निरीक्षक, तालुका पोलीस स्टेशन नांदगाव यांच्याकडे २७ जानेवारी २०२६ रोजी सादर केले आहे.
निवेदनात असा आरोप करण्यात आला आहे की, २६ जानेवारी रोजी झालेल्या प्रजासत्ताक दिनाच्या भाषणात मंत्री गिरीश महाजन यांनी भारतीय संविधानाचे शिल्पकार डॉ. बाबासाहेब आंबेडकर यांचा उल्लेख न करता जाणीवपूर्वक दुर्लक्ष केले. डॉ. आंबेडकरांच्या अतुलनीय योगदानाकडे दुर्लक्ष करणे हे त्यांच्या त्यागाचा अपमान असून, सामाजिक सलोख्यास धक्का देणारे आहे, असे निवेदनात नमूद करण्यात आले आहे.
या प्रकरणी राष्ट्रवादी युवक काँग्रेसतर्फे प्रशासनाकडे विविध मागण्या करण्यात आल्या आहेत. त्यामध्ये मुख्यमंत्री व गृहमंत्र्यांनी गिरीश महाजन यांचा मंत्रीपदाचा राजीनामा घ्यावा, त्यांच्यावर अॅट्रॉसिटी ॲक्टनुसार गुन्हा दाखल करण्यात यावा, तसेच महाराष्ट्र शासनाच्या २२ जानेवारी २०२१ च्या परिपत्रकानुसार नियमांचे उल्लंघन करणाऱ्या शाळा, महाविद्यालये व शासकीय कार्यालयांवर कारवाई करण्यात यावी, अशा मागण्यांचा समावेश आहे.
निवेदनाच्या तळाशी पोलीस स्टेशनचा ‘आवक’ शिक्का असल्याने हे निवेदन अधिकृतरीत्या स्वीकारण्यात आल्याचे स्पष्ट होते. हे निवेदन डॉ. बाबासाहेब आंबेडकर यांच्या सन्मानासाठी दिलेल्या राजकीय व सामाजिक लढ्याचे प्रतीक असल्याचे युवक काँग्रेसने नमूद केले आहे.
या निवेदनावर ज्येष्ट नेते नागसेन चव्हाण माजी नगरसेवक अरुण सावळे, गौतम जगताप, देविदास मोरे, मनोज चोपडे, विलास कोतकर, चिंधा बागुल, माजी नगरसेवक अनिल जाधव, सुनील निकम, भास्कर निकम, गणेश आहेर यांच्यासह इतर पदाधिकाऱ्यांच्या सह्या आहेत.
