शरद शेळके,वेगवान न्युज
नाशिक-पुणे महामार्गावरील मोहदरी-पास्ते घाटात झालेल्या एका तरुणाच्या निर्घृण खुनाचा उलगडा करण्यात एमआयडीसी सिन्नर पोलिसांना अवघ्या २४ तासांत यश आले आहे. आर्थिक व्यवहाराच्या वादातून हा खून झाला असून, पोलिसांनी दोन आरोपींना शिताफीने ताब्यात घेतले आहे.
घटनेचा थरार
दिनांक ३० डिसेंबर २०२५ रोजी मोहदरी घाटाच्या कडेला एका अज्ञात पुरुषाचा मृतदेह आढळून आला होता. मृताच्या पाठीवर आणि पायावर धारदार शस्त्राने वार करण्यात आले होते, तसेच गळा आवळून त्याची हत्या केल्याचे प्राथमिक तपासात दिसून आले. या घटनेमुळे परिसरात खळबळ उडाली होती. घटनेची माहिती मिळताच एमआयडीसी सिन्नर पोलीस ठाण्याचे निरीक्षक भरत जाधव आणि हेमंतकुमार भामरे यांनी पथकासह घटनास्थळी धाव घेतली.
तपासाची चक्रे आणि सीसीटीव्हीचा आधार
मृताची ओळख पटवणे हे पोलिसांसमोर सर्वात मोठे आव्हान होते. पोलिसांनी तांत्रिक तपास आणि परिसरातील सीसीटीव्ही फुटेजची तपासणी केली. तपासादरम्यान मृताची ओळख कमलेश कुमार लिलाधर पटेल (वय ३० वर्ष, मूळ रा. मध्यप्रदेश, सध्या रा. माळेगाव औद्योगिक वसाहत, सिन्नर) अशी पटली. सीसीटीव्ही फुटेजमध्ये कमलेश कुमार हा दोन इसमांसोबत मोटारसायकलवर जाताना दिसला होता.
अशी झाली अटक
आरोपी कोनांबे गावाकडून सिन्नरकडे येणार असल्याची गोपनीय माहिती पोलिसांना मिळाली. त्यानुसार पोलिसांनी समृद्धी महामार्गाच्या पुलाजवळ सापळा रचला. संशयित आरोपी मोटारसायकलवरून येताना दिसताच पोलिसांनी त्यांना अडवण्याचा प्रयत्न केला. पोलिसांना पाहून आरोपींनी पळ काढण्याचा प्रयत्न केला, मात्र सतर्क असलेल्या पोलीस पथकाने त्यांना जागीच पकडले.
पकडण्यात आलेले आरोपी:
१. अरुण बाळू पदमिरे (रा. उबाडे, ता. इगतपुरी, जि. नाशिक)
२. एक विधीसंघर्षित बालक (रा. कोनांबे, ता. सिन्नर, जि. नाशिक)
खुनाचे कारण उघड
पोलिसांनी कसून चौकशी केली असता आरोपींनी गुन्ह्याची कबुली दिली. कमलेश कुमार याच्याशी त्यांचा आर्थिक व्यवहार (पैशांचा व्यवहार) झाला होता. या व्यवहाराच्या वादातून त्यांनी कमलेशला दारू पाजण्याच्या बहाण्याने मोहदरी घाटात डोंगरावर नेले. तिथे वाद विकोपाला गेल्याने आरोपींनी धारदार चाकूने कमलेशवर वार केले आणि गळा आवळून त्याचा खून केला.
यांनी केली कामगिरी
नाशिक ग्रामीणचे पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर, उपविभागीय पोलीस अधिकारी के. के. पाटील यांच्या मार्गदर्शनाखाली एमआयडीसी सिन्नरचे पोलीस निरीक्षक भरत जाधव, हेमंतकुमार भामरे, अंबादास वाघसे, संतोष टेमगर आणि त्यांच्या पथकाने ही धाडसी कारवाई केली.
सध्या दोन्ही आरोपींना अटक करण्यात आली असून, पुढील तपास पोलीस निरीक्षक भरत जाधव करत आहेत.
