एसकेडी इंटरनॅशनल स्कूलचा गौरव! १९ व्या राष्ट्रीय स्काऊट गाईड जंबोरीत महाराष्ट्राचे नेतृत्व
देवळा : भावडे ता. देवळा येथील एसकेडी (SKD) इंटरनॅशनल स्कूलने लखनऊ येथे नुकत्याच पार पडलेल्या डायमंड जुबिली १९ व्या राष्ट्रीय भारत स्काऊट गाईड जंबोरीत महाराष्ट्राची मान उंचावली आहे. या भव्य सोहळ्याच्या उद्घाटन समारंभात, एसकेडी इंटरनॅशनल स्कूलमधील सहा विद्यार्थ्यांची महाराष्ट्राच्या ‘गार्ड ऑफ ऑनर’ (Guard of Honor) साठी निवड झाली.
या पथकाचे नेतृत्व कमांड लीडर कौशल खैरनार याने केले. रुतुजा पगार (राष्ट्र ध्वजधारक), आनंदी कपडणीस (स्काऊट-गाईड ध्वजधारक), गायत्री खैरनार (महाराष्ट्र ध्वजधारक), आदित्य कपडणीस आणि ईशा पगार या विद्यार्थ्यांनी आपल्या शिस्त, निष्ठा आणि दिमाखदार उपस्थितीने मान्यवरांना सलामी दिली. या सोहळ्याला उत्तर प्रदेशच्या राज्यपाल मा. श्रीमती आनंदीबेन पटेल यांची प्रमुख उपस्थिती लाभली, तसेच ७ देशांतील स्काऊट-गाईड विद्यार्थी सहभागी झाले होते. कार्यक्रमाचे निवेदन क्षितिजा तेली आणि मनस्वी कदम यांनी केले.
