वेगवान नाशिक/तुषार रौंदळ
विरगांव दि.१६ऑगस्ट२०२५ : – श्री नेमिनाथ जैन प्राथमिक शाळेत तसेच श्रीमती सगुनाबाई केदुलालजी टाटिया आदर्श बालविकास मंदिर येथे १५ ऑगस्ट स्वातंत्र्य दिन मोठ्या उत्साहात साजरा करण्यात आला. ध्वजारोहण संस्थेमध्ये प्रदीर्घ काळापासून कार्यरत असलेल्या श्री. कचरदासजी धनलालजी टाटीया सर यांच्या हस्ते पार पडले.
सकाळी सूर्यकिरणांत तिरंगा फडकवून ध्वजारोहण सोहळ्यानंतर, मैदानावर देशभक्तीची लहर पसरवणारी संगीत कवायत रंगली. इयत्ता चौथीच्या सुमारे २५० विद्यार्थ्यांनी शालेय पोशाखात, अचूक तालावर, देशभक्तीपर गीतांवर तालबद्ध हालचाली करत, हातातील झेंडे लहरवत, समन्वय साधून कवायत सादर केली. ढोल-ताशांच्या ठेक्यावर आणि गीतांच्या स्वरांवर पावले जुळवत विद्यार्थ्यांनी शिस्त, एकता आणि देशप्रेमाचा संदेश प्रभावीपणे पोहोचवला. प्रेक्षकांच्या टाळ्यांचा गजर आणि “भारत माता की जय”च्या घोषणांनी संपूर्ण वातावरण देशभक्तीच्या उत्साहाने भारावले.
या संगीत कवायतीच्या यशासाठी शाळेचे मुख्याध्यापक श्री. संदीप ललवाणी सर, ज्येष्ठ शिक्षक श्री. राधेश्याम चव्हाण सर, इयत्ता चौथीचे वर्गशिक्षक श्रीम. सारिका पगार मॅडम, श्री. किरण कुंवर सर, श्री. संतोष मढे सर, तसेच श्रीम. राजश्री बिनायक्या मॅडम यांनी विशेष परिश्रम घेतले. त्यांच्या मार्गदर्शनामुळे या सादरीकरणास उत्कृष्टतेचा दर्जा लाभला. या उत्कृष्ट सादरीकरणाची दखल घेऊन कवायतीस ₹११०० रोख बक्षीस प्रदान करण्यात आले, ज्यामुळे विद्यार्थ्यांचा उत्साह अधिक द्विगुणित झाला.
या प्रसंगी प्रमुख अतिथी मा. पिंटुभाऊ संचेती साहेब, मा. रविभाऊ आबड साहेब, संस्थेतील सर्व सन्माननीय पदाधिकारी, विविध शाखांचे प्राचार्य, सर्व शिक्षक व शिक्षकेतर कर्मचारी तसेच ग्रामस्थ मोठ्या संख्येने उपस्थित होते.
संस्थेचे विश्वस्त चेअरमन श्रीमानसा बेबीलालजी संचेती साहेब, प्रबंध समिती सदस्य श्रीमानसा अजित भाऊ सुराणा साहेब, मानद सचिव श्रीमानसा झुंबरलालजी भंडारी साहेब, तसेच श्रीमानसा नंदू भाऊ ब्रम्हेचा साहेब यांनी कार्यक्रमाच्या यशासाठी शिक्षक व विद्यार्थ्यांचे कौतुक केले व स्वातंत्र्य दिनाच्या शुभेच्छा दिल्या.
“विद्यार्थ्यांच्या पावलांतील लय, हातातील झेंडे, चेहऱ्यावरील तेज आणि हृदयातील देशप्रेम — हाच खरा स्वातंत्र्याचा उत्सव!”
ही रंगतदार संगीत कवायत केवळ एक सादरीकरण नव्हते, तर एकतेचा, शिस्तीचा आणि राष्ट्रप्रेमाचा जिवंत धडा होती. या अविस्मरणीय क्षणांनी उपस्थितांच्या मनावर देशभक्तीची अमिट छाप उमटवली आणि नव्या पिढीला प्रेरणेची नवी ज्योत दिली.
