वेगवान नाशिक /सागर मोर
वणी-पिंपळगाव रस्त्यालगत असलेल्या एका नवीन बिनशेती प्लॉट तयार करण्याचे काम गेल्या काही दिवसांपासून सुरू असुन रात्रीच्या वेळी शेकडो ट्रक अवैध मुरूम टाकला जात असल्याचा धक्कादायक प्रकार समोर आला आहे. . यामागे मोठ्या नेत्यांचा वरदहस्त असल्याचा आरोप होत असून, महसूल विभागाच्या भूमिकेवर प्रश्नचिन्ह निर्माण झाले आहे.
अवैध मुरूम वाहतूक आणि पर्यावरणाची हानी-
मागील काही दिवसांपासून रात्रीच्या वेळी या बिनशेती प्लॉटवर मुरूम टाकण्याचे काम सुरू आहे. शांत आणि रहदारी नसलेल्या या रस्त्यावर रात्रीच्या वेळी अचानक ट्रकची वर्दळ वाढल्याने नागरिकांचे लक्ष वेधले गेले होते .
या ठिकाणी दररोज शेकडो ट्रक मुरूम आणला जात असून, यामुळे नैसर्गिक संसाधनांची बेकायदेशीर लूट होत आहे. शासनाचा लाखो रुपयांचा महसूल बुडत असताना, हा प्रकार बिनदिक्कतपणे सुरू असल्याबद्दल आश्चर्य व्यक्त केले जात आहे.ग्रामपंचायत जागेवर अतिक्रमण आणि प्रशासकीय कारवाई प्लॉटधारकांनी सर्व नियमांना धाब्यावर बसवून रातोरात ग्रामपंचायतीच्या जागेत १२ मीटरचा रस्ता तयार केला होता.
ग्रामपंचायतीच्या पदाधिकाऱ्यांनी ही बाब वेळीच लक्षात घेऊन तात्काळ हा रस्ता जेसीबीच्या मदतीने बंद केला आणि तार कंपाऊंड करून जागा संरक्षित केली. यामुळे प्लॉटधारकांचा हा प्रयत्न फसला. मात्र, एवढे मोठे धाडस करण्यामागे त्यांना कोणाचे राजकीय पाठबळ आहे, याची चर्चा आता परिसरात सुरू झाली आहे.
स्थानिकांना होणारा त्रास आणि मुजोर माफिया:-
ग्रामपंचायतीने पुढच्या बाजूचा रस्ता बंद केल्याने, आता मुरूम वाहतूक करणारे ट्रक वस्तीतून ये-जा करत आहेत. यामुळे रात्रीच्या वेळी मोठ्या प्रमाणात वर्दळ वाढली असून, शांतता भंग होत आहे. धूळ आणि आवाजाचा त्रासही वाढला आहे. काही स्थानिक नागरिकांनी याला विरोध करण्याचा प्रयत्न केला असता, त्यांना मुजोर अवैध मुरूम टाकणारे आणि काही स्थानिक कार्यकर्त्यांकडून धमकावले जात असल्याचा आरोप होत आहे. यामुळे नागरिक अधिकच भयभीत झाले आहेत.
प्रशासनाच्या भूमिकेवर प्रश्नचिन्ह
या संपूर्ण प्रकरणाची माहिती असूनही महसूल विभागाकडून कोणतीही ठोस कारवाई होताना दिसत नाही. यामुळे प्रशासनाच्या कार्यक्षमतेवर आणि भूमिकेवर प्रश्नचिन्ह निर्माण झाले आहे. “महसूल विभाग याची चौकशी करून संबंधित व्यक्तींवर कारवाई करेल का?” असा प्रश्न सामान्य माणसाला पडला आहे. अवैध धंद्यांना आळा घालण्यासाठी प्रशासनाने त्वरित लक्ष देऊन दोषींवर कठोर कारवाई करण्याची मागणी जोर धरू लागली आहे.
चौकट:-
वणी-पिंपळगावमधील हे प्रकरण केवळ अवैध मुरूम डंपिंगपुरते मर्यादित नसून, त्यात राजकीय वरदहस्त, ग्रामपंचायत जागेवरील अतिक्रमण आणि स्थानिक नागरिकांचा त्रास असे अनेक गंभीर पैलू आहेत. प्रशासनाने याकडे गांभीर्याने लक्ष देऊन तात्काळ कारवाई न केल्यास, असे प्रकार भविष्यात वाढतच जातील आणि कायदा-सुव्यवस्थेचा प्रश्न निर्माण होऊ शकतो. महसूल विभाग आणि पोलीस प्रशासन यावर कोणती ठोस भूमिका घेणार, याकडे सर्वांचे लक्ष लागून आहे.
या मुरूम माफियांचे धाडस इतके वाढले आहे की त्यांनी थेट ग्रामपंचायतीच्या जागेत १२ मीटरचा रस्ता तयार करण्याचे धाडस केले. ग्रामपंचायतीने हा रस्ता तातडीने बंद केला असला तरी, या गंभीर प्रकारामुळे स्थानिकांमध्ये संतापाचे वातावरण आहे
