एसकेडी स्कूलमध्ये शिक्षण सप्ताह ; सर्वगुणसंपन्न विद्यार्थी घडविण्यासाठी शिक्षक सरसावले

वेगवान नाशिक / बाबा पवार

देवळा : एसकेडी इंटरनॅशनल स्कूल  मध्ये २२ ते २८ जुलै दरम्यान “शिक्षण सप्ताह” आयोजित करण्यात आला असून  या सप्ताह अंतर्गत विविध कार्यक्रमांचे आयोजन करण्यात आले आहे.

या शिक्षण सप्ताह निमित्ताने विद्यार्थ्यांच्या कला गुणांना वाव मिळावा, त्यांना व्यवहार ज्ञान मिळावे, विविध संस्कृतीची ओळख व्हावी, या गोष्टींवर विशेष भर दिला जात आहे. यामुळे शालेय जीवनात शिक्षण घेत असतांना विद्यार्थ्यांच्या सामाजिक ज्ञानात भर पडून सर्वगुणसंपन्न विद्यार्थी तयार होण्यास मदत होणार आहे.

विद्यार्थी वर्गाला व्यवहारिक ज्ञान प्राप्त व्हावे यासाठी प्रत्यक्ष विद्यार्थ्यांना बाजारात नेत तेथील दैनंदिन व्यवहार समजवून सांगणे, विद्यार्थी वर्गाने तयार केलेल्या कवितांचे स्कूल मध्ये प्रदर्शन, मजेशीर शिक्षण पद्धती, बांबू सारख्या वस्तूंपासून विविध वस्तूंची निर्मिती, सुलभ गणिती पद्धतीसाठी सांकेतिक कोडे, असे विविध उपक्रम या सप्ताह अंतर्गत स्कूल मध्ये राबविण्यात येत आहेत.