वादळी वाऱ्यासह आलेल्या पावसामुळे बैलगोठा व घर कोसळले!

देवळा : भऊर ता. देवळा येथील रामभाऊ नथु आहेर यांचा बैलगोठा व त्याला लगत असलेले घर वादळीवारा व पावसामुळे पडाल्याने आहेर यांचे मोठे नुकसान झाले आहे. सुदैवाने या घटनेत कुठलीही जीवित हानी झाली नाही.

आज सकाळ पासून वातावरणात उकाडा जाणवत होता. दुपारी पावसाचे वातावरण तयार होऊन वादळी वाऱ्यासह पावसाला सुरवात झाली. काल देखील काही या परिसरात पाऊस झाला होता. त्यात आज देखील पावसाने सुरवात केल्याने शेतीला या पावसाचा फायदा होणार असल्याने रामभाऊ आहेर हे देखील आनंदात होते. मात्र, त्यांचा हा आनंद दीर्घकाळ टिकू शकला नाही. कालचा पाऊस व आजचा वादळी वाऱ्यासह आलेला पाऊस यामुळे आहेर यांच्या बैलाचा गोठा व त्याला लगत असलेलं घर कोसळले.

सुदैवाने या घटनेत कुठलीही जीवित हानी झाली नाही. या घटनेमुळे आहेर यांचे आर्थिक नुकसान झाले असून त्यांना शासकीय मदत मिळावी अशी मागणी होत आहे.