नाशिक शहरातील या भागात घरावर छापा टाकत २८ किलो गांजा जप्त….

वेगवान नाशिक/ नाशिक नितीन चव्हाण, ता:,३१मे २०२४

पोलिस आयुक्तालय हद्दीतील गुन्हे शाखा युनिट एकच्या पथकाने वडाळा गावातील एका घरावर छापा टाकून २८ किलो गांजा जप्त केला आहे.

हा गांज्या धुळे जिल्ह्यातील शिरपूर मार्गे नाशिकमध्ये पुरवठा केल्याचे समोर आले असून त्याची वडाळागावातून नाशिकमध्ये छुप्या पद्धतीने विक्री केली जात असल्याचे तपासात समोर आले आहे.

याबाबतची अधिकृत माहिती अशी की गुन्हे शाखेच्या युनिट एकचे अंमलदार मुख्तार शेख यांना वडाळा गावात शहा नामक व्यक्तीच्या घरात गांजाचा मोठा साठा असल्याची माहिती मिळाली होती.

पोलीस आयुक्त संदीप कर्णिक, गुन्हे शाखेचे उपायुक्त प्रशांत बच्छाव, सहाय्यक आयुक्त डॉ. सीताराम कोल्हे व युनिट एकचे वरिष्ठ निरीक्षक मधुकर कड यांच्या निर्देशानुसार पथकाने संशयित ,शाहरुख शहा रफिक शहा (वय २९, रा. ए-८, म्हाडा वसाहत बिल्डिंग, वडाळागाव, मूळ रा. मेहबूबनगर, नाशिक)
शहा याच्या घरात छापा टाकला.

त्यावेळी पथकाच्या हाती सव्वाचार लाख रुपयांचा ओलसर गांजा हाती लागला.

या गांजासह एक मोबाईल असा ४ लाख ३१ हजारांचा मुद्देमाल हस्तगत करण्यात आला असून शहाला ताब्यात घेण्यात आले आहे.

यानंतर त्याच्याकडे अधिक चौकशी सुरू असून इंदिरानगर पोलीस ठाण्यात एनडीपीएस कायद्यान्वये गुन्हा दाखल करण्यात आला आहे. पुढील तपास इंदिरानगर पोलिस ठाण्याचे वरिष्ठ पोलिस निरीक्षक अशोक शरमाळे यांच्या मार्गदर्शनाखाली पोलिस उपनिरीक्षक भुषण सोनार करीत आहेत.

नितीन चव्हाण